Pasagjerët që fluturojnë nga vendet e Bashkimit Evropian pritet të përfitojnë nga rregulla të reja për bagazhet, çmimet e biletave, ulëset e familjeve dhe të drejtat në rast vonesash apo anulimesh.
Një nga ndryshimet kryesore është vendosja e një standardi minimal për bagazhin personal falas. Çdo pasagjer do të mund të marrë në kabinë pa pagesë shtesë një çantë të vogël, çantë shpine ose çantë laptopi me përmasa deri në 40 x 30 x 15 cm, e cila duhet të futet poshtë ulëses përpara.
Kjo nuk do të thotë se edhe valixhja e kabinës do të jetë falas. Kompanitë ajrore mund të vazhdojnë të kërkojnë pagesë për bagazhin që vendoset në ndarjet mbi kokë, por tarifat do të duhet të jenë të qarta që në momentin e rezervimit, pa “surpriza” në fund të blerjes.
Rregullat e reja parashikojnë gjithashtu që fëmijët nën 14 vjeç të ulen pranë prindit ose shoqëruesit pa pagesë shtesë për zgjedhjen e ulëses. Po ashtu, nëse një pasagjer humbet fluturimin e vajtjes, kompania nuk do të mund t’i anulojë automatikisht edhe biletën e kthimit vetëm për këtë arsye.
Paketa parashikon edhe mbrojtje më të madhe në rast vonesash, anulimesh dhe për personat me aftësi të kufizuara ose lëvizshmëri të reduktuar.
Megjithatë, rregullat nuk zbatohen ende menjëherë në çdo aeroport apo kompani ajrore. Deri në përfundimin e procedurave dhe hyrjen zyrtare në fuqi, udhëtarët duhet të kontrollojnë rregullat konkrete të kompanisë me të cilën do të fluturojnë.
