Një sasi e produktit “Flips Ketchup” është urdhëruar të tërhiqet nga tregu pasi është konstatuar prania e gjurmëve të qumështit, i cili nuk ishte deklaruar në etiketë.
Agjencia e Ushqimit dhe Veterinarisë (AUV) bëri me dije se përmes Sistemit Evropian të Alarmimit të Shpejtë për Ushqim (RASFF) është njoftuar për problemin me produktin e prodhuesit “PESTOVA L.L.C”, me datë skadimi 11.02.2027.
Sipas njoftimit, gjatë një kontrolli zyrtar në Slloveni është marrë mostër e produktit dhe analizat laboratorike kanë zbuluar gjurmë qumështi. Për personat alergjikë ndaj këtij alergjeni, produkti është vlerësuar si i pasigurt për konsum.
Kontrollet në Kosovë kanë zbuluar se në stokun e kompanisë ndodhej produkti me lot FK 04/26, i prodhuar në 20 mijë e 406 pako, i cili ishte eksportuar edhe në disa vende.
AUV ka urdhëruar tërheqjen e menjëhershme të produktit nga tregu dhe ka ndaluar shitjen apo shpërndarjen e tij deri në përfundimin e verifikimeve.
Konsumatorëve u bëhet thirrje që, nëse e kanë blerë këtë produkt, të mos e konsumojnë dhe ta kthejnë në pikën e blerjes.
