Një qytetar nga Durrësi i është drejtuar redaksisë së JOQ Albania me një denoncim ndaj kompanisë së mobiljeve “Luna Home”, duke pretenduar se ka paguar 1.2 milionë lekë të vjetra për një kuzhinë, por pas më shumë se 5 muajsh punimet nuk janë përfunduar.
Sipas denoncuesit, matjet e kuzhinës janë bërë më 13 prill, ndërsa vlera totale e porosisë ishte 1.6 milionë lekë të vjetra, me një çmim prej 400 mijë lekësh të vjetra për metër linear. Ai thotë se ka paguar paraprakisht 1.2 milionë lekë të vjetra.
Qytetari pretendon se gjatë muajve në vijim ka pasur komunikime të vazhdueshme me kompaninë për përfundimin e porosisë, por afatet janë shtyrë disa herë. Nga komunikimet e dërguara në redaksi shihen mesazhe ku palët diskutojnë për data dhe orare të ndryshme për dorëzimin e pjesëve të mbetura.
Sipas tij, kuzhina është montuar vetëm pjesërisht. Në fotot e dërguara në redaksi dallohet struktura e mobilieve, ndërsa mungojnë dyert/kapakët e dollapëve, disa panele të sirtarëve dhe pjesë të tjera përfundimtare të kuzhinës.
Në një prej komunikimeve, qytetari kërkon që, nëse pjesët e mbetura nuk mund të përfundojnë, t'i jepet një zgjidhje alternative, duke përfshirë produkte të tjera nga showroom-i. Në biseda diskutohen edhe kapakët e kuzhinës dhe një divan i publikuar nga kompania.
Denoncuesi pretendon gjithashtu se ka tentuar të kontaktojë disa herë me përfaqësuesin e kompanisë dhe se komunikimi ka qenë i vështirë, duke përmendur telefonata pa përgjigje dhe bllokime të numrave.
Ai e cilëson rastin si mashtrim, por ky është pretendimi i tij dhe përgjegjësia përfundimtare lidhur me përmbushjen e porosisë dhe çdo detyrim të mundshëm ligjor kërkon verifikim.
Qytetari thotë se i ka dërguar JOQ Albania komunikimet, fotot dhe materialet e tjera që disponon dhe kërkon që rasti të bëhet publik, duke kërkuar një zgjidhje për kuzhinën ose kthimin e shumës së paguar.
JOQ Albania publikon denoncimin dhe provat e dërguara nga qytetari, ndërsa mbetet e hapur për reagimin dhe sqarimin e kompanisë “Luna Home” lidhur me pretendimet e ngritura.
