Një person i moshuar është gjetur mbrëmjen e sotme i shtrirë në mes të rrugës, pranë rrethrrotullimit të luleve në Elbasan.
Pamjet e mbërritura në redaksinë e JOQ Albania tregojnë të moshuarin të shtrirë në rrugë, ndërsa qytetarët kanë kërkuar ndihmë mjekësore.
Sipas dëshmitarit që ndodhej në vendngjarje, bëhet fjalë për një person rreth 65-70 vjeç, i cili ishte në gjendje të rëndë dhe nuk lëvizte, ndërsa sipas tij kishte puls dhe merrte frymë.
Dëshmitari thotë se nuk e ka parë momentin se çfarë i kishte ndodhur të moshuarit, ndaj nuk dihet nëse ai është përfshirë në një aksident rrugor apo është ndier keq dhe ka humbur ndjenjat.
Ajo që ngre shqetësim është koha e mbërritjes së ambulancës. Dëshmitari pretendon se urgjenca e Elbasanit u njoftua menjëherë, por ambulanca është vonuar për më shumë se 20 minuta.
“Dëshmitarët telefonuan ambulancën, pritën që të vinte”, shkruhet në mesazhin e dërguar bashkë me pamjet, ndërsa dëshmitari shton se disa prej personave të pranishëm u larguan pasi pritën për një kohë të gjatë.
Sipas tij, nga spitali deri në vendngjarje janë rreth 5 minuta rrugë.
Deri në këto momente nuk ka një njoftim zyrtar nga Policia apo autoritetet shëndetësore për rrethanat e ngjarjes dhe gjendjen e të moshuarit.
