Një banor i është drejtuar redaksisë së JOQ Albania për të denoncuar praninë e mbetjeve të një fabrike këpucësh në Allias, pranë rrugës “Niko Avrami” dhe Shkollës së Bashkuar.
Sipas denoncuesit, mbetjet kanë qëndruar në këtë zonë prej rreth 7 muajsh, pa u larguar apo pastruar.
Në pamjet e dërguara në redaksi shihet një grumbull i madh mbetjesh të hedhura në ambient të hapur. Mes tyre dallohen copa lëkure, pëlhura, tabanë këpucësh, qese plastike, kartonë dhe materiale të tjera.
“Kam 7 muaj që s’i heq njeri. Janë afër rrugës Niko Avrami, mbetjet e fabrikës së këpucëve. Është një fabrikë afër Shkollës së Bashkuar, në zonën e Alliasit.”
Kamera tregon gjithashtu mbetje të tjera të shpërndara përreth, disa prej tyre të djegura ose të dekompozuara, si dhe materiale të vjetra pranë rrethimit të zonës.
Banori shprehet i shqetësuar për faktin se mbetjet ndodhen pranë zonës së banuar dhe kërkon që institucionet përgjegjëse të verifikojnë situatën dhe të marrin masa për pastrimin e hapësirës.
JOQ Albania publikon pamjet dhe denoncimin e banorit, ndërsa kërkon verifikimin e origjinës së mbetjeve, përgjegjësisë për depozitimin e tyre dhe ndërhyrjen për pastrimin e zonës.
