Nxënësit që vizituan Festivalin dhe Panairin e Librit për Fëmijë në Prishtinë kanë treguar interesimin e tyre për librat historikë, veçanërisht ata që lidhen me historinë e Kosovës dhe luftën e UÇK-së.
Një prej nxënëseve, Simona Tanushaj, tha se leximi e ndihmon të pasurojë dijet dhe mënyrën e të shprehurit, ndërsa tregoi se kishte zgjedhur një libër për historinë e Kosovës.
“Kam qejf me mësu për historinë e Kosovës, me ditë çka u bo në luftë”, u shpreh ajo, duke shtuar se panairi i librit ishte një aktivitet që e kishte vizituar edhe më parë.
Edhe nxënësi Ar Zajmi tregoi se përveç librave për futbollin, i pëlqejnë edhe librat që trajtojnë historinë dhe UÇK-në.
Ndërsa Rron Berisha tha se librat për fëmijë janë të rëndësishëm pasi përmes tyre mëson më shumë për vendin e tij.
Festivali dhe Panairi i Librit për Fëmijë po zhvillohet në Amfiteatrin e Sheshit “Zahir Pajaziti” në Prishtinë, ku për pesë ditë fëmijët dhe familjet mund të marrin pjesë në aktivitete kulturore, edukative dhe artistike.
