Një qytetar i është drejtuar redaksisë së JOQ Albania për të kërkuar ndihmë pas humbjes së portofolit në Kamëz.
Sipas tij, portofoli i ka rënë padashje rreth orës 22:30, teksa po zbriste nga makina, përballë shkollës “Ibrahim Rrugova”.
Në pamjet e kamerave të sigurisë shihet një person që kalon pranë vendit ku ndodhet portofoli, ndalon pranë një automjeti të parkuar dhe e merr objektin nga toka.
Më pas, personi largohet duke vazhduar rrugën.
Qytetari thotë se në portofol kishte dokumente, sende personale dhe një shumë parash që i nevojitej për të kryer një pagesë.
Ai i bën thirrje personit që e ka gjetur portofolin ta dorëzojë te dyqani i pjesëve të këmbimit për makina, pranë vendit ku ka ndodhur ngjarja.
“Nëse nuk e dorëzon vlerën, nuk ka problem, vetëm të më kthejë gjërat personale.”
Qytetari kërkon gjithashtu që, gjatë publikimit të pamjeve, fytyra e personit të mos bëhet e dallueshme.
JOQ Albania publikon pamjet me kërkesën e qytetarit dhe me shpresën që portofoli, veçanërisht dokumentet dhe sendet personale, t’i rikthehen pronarit.
