Bizneset kosovare do të kenë mundësi të dërgojnë përkohësisht mallra, pajisje dhe mostra jashtë vendit pa paguar detyrime doganore apo taksa importi, pas përfshirjes së Kosovës në sistemin ndërkombëtar ATA Carnet.
Lajmi është bërë i ditur nga Oda Ekonomike e Kosovës, e cila do të jetë institucioni që do të lëshojë këtë dokument, i njohur ndryshe si “pasaporta e mallit”.
ATA Carnet do të përdoret kryesisht për mallra që dërgohen në panaire, ekspozita apo aktivitete të ndryshme jashtë Kosovës, duke thjeshtuar procedurat doganore dhe duke mundësuar kthimin e tyre pa kosto shtesë.
Sipas OEK-ut, ky hap pritet t’u lehtësojë bizneseve kosovare pjesëmarrjen në tregjet ndërkombëtare, promovimin e produkteve vendore dhe zgjerimin e eksporteve. Oda pritet të publikojë së shpejti edhe procedurat dhe kushtet për përdorimin e këtij dokumenti.
