Një qytetar i është drejtuar redaksisë së JOQ Albania për të denoncuar vendosjen e disa barrierave në rrugën dytësore që lidh fshatin Lifaj me aksin Lushnjë–Berat.
Sipas denoncuesit, pengesat janë vendosur prej më shumë se një jave në mes të rrugës, pa sinjalistikë apo tabela paralajmëruese.
Në pamjet e dërguara në redaksi shihet një pengesë e vendosur tërthorazi në të dyja korsitë e rrugës, ndërsa nuk dallohet ndonjë sinjalistikë që paralajmëron drejtuesit përpara se të mbërrijnë te ajo.
Denoncuesi thotë se situata është veçanërisht problematike gjatë natës, pasi rruga nuk ka ndriçim.
“Ju lutem bëjeni publike sepse po çahen gomat e automjeteve çdo ditë, sidomos natën që s’ka asnjë lloj ndriçimi.”
Sipas tij, vendosja e barrierave nuk shoqërohet me ndonjë leje, sinjalizim apo masë sigurie, ndërsa qytetari pretendon se ka bërë edhe një denoncim përmes e-Albania, por deri tani nuk ka marrë reagim.
Për shkak se nga pamjet nuk mund të përcaktohet nëse pengesat janë vendosur me autorizim apo jo, kjo pjesë kërkon verifikim nga institucionet përgjegjëse.
JOQ Albania publikon pamjet dhe shqetësimin e banorëve, duke kërkuar verifikimin e situatës dhe ndërhyrjen e autoriteteve për të garantuar sigurinë e drejtuesve të mjeteve.
