Pas më shumë se 27 vitesh ankth e pritje, familja Mëziu nga Marina e Skenderajt ka marrë lajmin për identifikimin e eshtrave të Salih Mëziut, njërit prej personave të zhdukur gjatë luftës në Kosovë.
Lajmin e ka bërë të ditur djali i tij, Tomor Mëziu, përmes një postimi emocionues, ku ka përshkruar dhimbjen e familjes gjatë gjithë këtyre viteve, mes shpresës për gjetjen e babait të tij dhe pasigurisë për fatin e tij.
“Për kaq gjatë kemi jetuar me ankthin, shpresën dhe dhimbjen e pritjes, duke mos ditur se ku prehej i baba ynë”, ka shkruar ai.
Salih Mëziu ishte njëri nga 10 pjesëtarët e familjes Mëziu nga Marina e Skenderajt, të zhdukur gjatë luftës.
Familja ka bërë të ditur se ende pret identifikimin e pjesëtarëve të tjerë, me shpresën që pas kaq shumë vitesh t’u japë edhe atyre lamtumirën e fundit.
Nga e njëjta varrezë masive në Mitrovicë janë identifikuar edhe mbetjet mortore të Adem Beqirit dhe Idriz Rrecajt.
