Studentët që po kryejnë regjistrimet për akomodimin në konviktet pranë godinave të Mjekësisë denoncojnë pritje të gjata dhe vështirësi gjatë procesit.
Një student i pranishëm në radhë shprehet se ka mbërritur që në orën 04:00 të mëngjesit por edhe pse ora po shkon 15:00, procesi për shumë prej studentëve ende nuk ka përfunduar.
“Që në orën 4 të mëngjesit jemi këtu. Deri tani, ora është gati 3 dhe punët kanë mbaruar vetëm për disa. Ne të tjerët vazhdojmë të presim në radhë, pa e ditur nëse do ta mbyllim procesin sot apo jo”, raporton studenti.
Sipas tij, situata është shoqëruar edhe me pakënaqësi për kushtet e akomodimit.
“U bëmë copash për një copë dhomë që as kushtet bazë nuk i ka”, shprehet ai.
Studentët kërkojnë që procesi i regjistrimit të zhvillohet në mënyrë më të organizuar dhe që problematikat lidhur me kushtet e konvikteve të marrin zgjidhje. Ata hedhin akuza për favorizime për ata që kanë miq e njohje në administratën e univeristetit duke mbaruar punë të parët dhe papritur fare në radhë.
