Hetimi i policisë federale në Antwerp ndaj një organizate shqiptare të dyshuar për trafik ndërkombëtar droge ka çuar në arrestimin e tetë personave. Në qendër të hetimit është një 48-vjeçar nga Berchem, i njohur me pseudonimin “Arben L.”, i cili dyshohet se vepronte si ndërmjetës mes grupeve nga Shqipëria, Amerika Latine dhe rrjeteve të shpërndarjes në Evropë e Australi. Për muaj të tërë, detektivët ndoqën aktivitetin e tij dhe përdorën pajisje përgjimi, ndërsa gjatë hetimit u sekuestruan gjithsej 99 kilogramë kokainë.
Në kuadër të operacionit u arrestua edhe Gert Gjinarari, i njohur si “Gjenerali”, një 52-vjeçar shqiptar i kërkuar ndërkombëtarisht për një vrasje të kryer në Itali në vitin 1997. Gjinarari u arrestua në Antwerp nga ekipi FAST dhe ekstradimi i tij drejt Italisë është ende në proces. Gjatë kontrolleve në disa adresa në Antwerp, Berchem, Deurne, Kapellen dhe Bruksel, policia gjeti armë e municione, jelekë antiplumb, bllokues, para cash, dokumente të falsifikuara dhe pajisje që dyshohet se përdoreshin për prodhimin e blloqeve të kokainës.
Hetimi u zhvillua në bashkëpunim të ngushtë me autoritetet shqiptare dhe Europolin. Si rezultat i këtij bashkëpunimi, në portin e Durrësit u sekuestrua një ngarkesë me 37 blloqe kokainë, me peshë totale rreth 41 kilogramë, e fshehur në një kontejner frigoriferik që kishte udhëtuar nga Itajaí i Brazilit përmes Tanger Med në Marok dhe Pireut në Greqi. Katër nga të dyshuarit e ndaluar u paraqitën para dhomave të këshillit në Antwerp; dy prej tyre mbetën në paraburgim, ndërsa për dy të tjerë u kërkua shtyrja e seancës. Hetimi gjyqësor vijon.
