Një qytetar i është drejtuar redaksisë së JOQ Albania për të ngritur shqetësimin mbi peshkimin me rrjeta pranë bregut të Adriatikut.
Në pamjet e dërguara shihet një varkë e vogël peshkimi pranë vijës bregdetare, ndërsa peshkatari tërheq dhe menaxhon rrjetat e vendosura në ujërat e cekëta.
Qytetari ngre pikëpyetje mbi ligjshmërinë e kësaj praktike dhe thotë se situata, sipas tij, përsëritet prej vitesh.
“A është e ligjshme gjuetia afër bregut me rrjeta? Për vite me radhë gjuhet me rrjeta nga barka të vogla afër bregut. Një nga arsyet pse asnjëherë nuk ka peshk në breg të Adriatikut.”
Rregullat për peshkimin në ujërat pranë bregut varen nga lloji i mjetit të peshkimit, madhësia e rrjetës, zona, distanca nga bregu dhe licenca përkatëse. Për këtë arsye, vetëm nga pamjet nuk mund të përcaktohet nëse në këtë rast ka shkelje.
Megjithatë, shqetësimi i qytetarit lidhet me ndikimin që peshkimi i përsëritur pranë bregut mund të ketë te burimet peshkore dhe ekosistemi detar.
JOQ Albania publikon pamjet dhe denoncimin, ndërsa kërkon që strukturat përgjegjëse të verifikojnë nëse peshkimi në këtë zonë dhe me këtë mënyrë është në përputhje me rregullat dhe licencat në fuqi.
