Një 46-vjeçar shqiptar është dënuar me 6 vite burg nga drejtësia austriake, pasi u shpall fajtor për grabitjen e 9 banesave në Vorarlberg të Austrisë.
Ngjarjet kanë ndodhur gjatë periudhës korrik-gusht 2025, ndërsa dëmi i shkaktuar nga vjedhjet llogaritet në rreth 14 mijë euro.
Sipas raportimeve, në disa prej grabitjeve dyshohet se ka marrë pjesë edhe një bashkëpunëtor.
Mediat austriake e kanë cilësuar të pandehurin si “turisti i vjedhjeve”, pasi ai dyshohet se udhëtonte për të kryer grabitje.
Identifikimi i tij u bë përmes gjurmëve të ADN-së të gjetura në vendngjarje, ndërsa më pas ishte shpallur në kërkim me një urdhër-arresti europian.
Sipas hetimeve, 46-vjeçari dyshohet se kishte probleme me lojërat e fatit dhe rreth 12 mijë euro borxhe ndaj bankave.
Ky nuk ishte rasti i parë penal për të, pasi më herët ai kishte vuajtur dënime me burg edhe në Suedi dhe Danimarkë për vepra të ngjashme.
