Në ditën e 102-të të protestës, një grup protestuesish janë zhvendosur nga hapësira përpara Kryeministrisë drejt Unazës së Tiranës, duke vijuar aksionin e tyre në disa prej akseve kryesore të kryeqytetit.
Me thirrjet “Fikini makinat” dhe “Rama jep dorëheqjen”, protestuesit janë vendosur në rrugë, duke penguar përkohësisht qarkullimin e automjeteve dhe duke sjellë radhë të gjata trafiku.
Siç shihet dhe në pamjet e mbërritura në redaksinë e JOQ Albania, një numër i madh automjetesh janë detyruar të qëndrojnë në radhë, ndërsa protestuesit vijojnë aksionin.
Në nisje të protestës, grupi është vendosur në urën e madhe të Unazës, ku ka bllokuar qarkullimin në një prej segmenteve kryesore të Tiranës.
Më pas, protestuesit kanë vijuar marshimin nëpër kryeqytet, duke u ndalur edhe në kryqëzimin e “Rrugës së Elbasanit”. Aty janë ulur në rrugë dhe kanë penguar përkohësisht kalimin e një autobusi të transportit publik.
Pavarësisht vështirësive të krijuara në qarkullim, protesta e sotme vijon me marshim dhe tubime në disa zona të Tiranës, ndërsa protestuesit përsërisin thirrjet e tyre kundër qeverisë dhe kërkesën për dorëheqjen e kryeministrit Edi Rama.
