Një qytetar shqiptar, i cili ndodhet në Luksemburg, ka përcjellë për JOQ një apel për të gjithë shoferët shqiptarë: merrni pak shembull nga mënyra sesi respektohen rregullat e qarkullimit në Europë.
Në një nga vendet më të zhvilluara të Europës, rregullat e qarkullimit nuk janë thjesht tabela dekorative. Kufijtë e shpejtësisë respektohen, kontrollet janë të vazhdueshme dhe shkeljet ndëshkohen. Luksemburgu përdor radarë fiksë, mobilë, radarë semafori dhe sisteme për matjen e shpejtësisë mesatare.
Por pyetja që lind është e thjeshtë: pse shqiptarët dinë t’i zbatojnë rregullat sapo kalojnë kufirin?
Në Europë nuk guxon askush të ecë si i çmendur, të parakalojë ku t’i dojë qejfi apo të shpërfillë kufijtë e shpejtësisë. Sepse e dinë që ligji funksionon dhe ndëshkimi nuk vonon.
Ndërsa sapo kthehen në Shqipëri, për disa prej tyre duket sikur ndryshon gjithçka. Semafori bëhet “sugjerim”, vijat e bardha humbasin kuptimin dhe shpejtësia e lejuar duket si një numër që askush nuk ka detyrim ta respektojë.
Pra, nuk është se shqiptari nuk di të respektojë rregullat. I respekton shumë mirë kur shkon në Europë. Atëherë pse nuk i respekton edhe në vendin e tij?
Qytetari apelon që shoferët shqiptarë të marrin shembull nga vendet europiane, sepse rregullat e qarkullimit nuk janë vendosur për të të prishur qejfin, por për të shpëtuar jetë.
