Dëme të mëdha janë shkaktuar nga zjarri në zonën e Fushë-Krujës, ku sipas një banori janë djegur sipërfaqe të konsiderueshme me ullinj, përfshirë edhe ullinj shekullorë.
Në pamjet e reja të dërguara në redaksi shihet një helikopter zjarrfikës duke ndërhyrë nga ajri, ndërsa pjesa tjetër e videos tregon sipërfaqe të mëdha të djegura, shkurre të karbonizuara dhe gardhe të dëmtuara.
Në disa zona vijojnë të duken tym dhe vatra të vogla zjarri, ndërsa pasojat e flakëve janë të dukshme në të gjithë sipërfaqen e përfshirë.
Sipas banorit, zjarri ka përfshirë më shumë se 50 hektarë, duke shkaktuar dëme të konsiderueshme në tokat bujqësore dhe ullishtet e zonës.
JOQ Albania publikon pamjet e reja dhe dëshminë e banorit, ndërsa përmasat e sakta të dëmeve dhe sipërfaqes së djegur pritet të përcaktohen nga autoritetet.
