Java ka nisur në mënyrën më tragjike në rrugët shqiptare. Vetëm gjatë ditës së hënë janë raportuar katër aksidente të rënda në akse të ndryshme të vendit, me një bilanc paraprak prej 2 personash të vdekur dhe të paktën 16 të plagosur.
Viktima e parë u regjistrua në orët e para të mëngjesit në autostradën Durrës-Tiranë, ku rreth orës 05:20 një aksident zinxhir përfshiu pesë automjete. 45-vjeçari Hysen Balla humbi jetën në vendngjarje pas përplasjes me një kamion, ndërsa pesë persona të tjerë mbetën të lënduar.
Por tragjedia nuk u ndal me kaq.
Pak më vonë, një tjetër aksident fatal ndodhi në autostradën Levan-Tepelenë, pranë Rrethrrotullimit të Levanit. Përplasja mes një “Audi” dhe një “Benz”-i i mori jetën 55-vjeçarit Dashmir Beca, ndërsa shoferi tjetër dhe tre pasagjerë mbetën të plagosur. Paraprakisht dyshohet se shpejtësia mbi normat e lejuara ka qenë shkaku kryesor i aksidentit.
Ndërkohë, në aksin Pogradec-Korçë, në segmentin e Qafë Plloçës, dy automjete që udhëtonin në drejtime të kundërta u përplasën me njëra-tjetrën. Dy vajza mbetën të lënduara dhe u transportuan drejt spitalit të Pogradecit.
Bilanci i të plagosurve u rëndua më tej në fshatin Gumenicë të Selenicës, ku një automjet u përplas me një furgon pasagjerësh. Si pasojë e aksidentit, gjashtë persona mbetën të lënduar dhe u dërguan me autoambulanca drejt Spitalit Rajonal të Vlorës.
Pra, vetëm në pak orë, rrugët shqiptare kanë prodhuar një tjetër bilanc alarmant: 2 viktima dhe të paktën 16 të plagosur.
Një javë e re sapo ka nisur, por rrugët e vendit duket se nuk po gjejnë qetësi. Aksident pas aksidenti, jetë të humbura dhe dhjetëra familje që presin lajme nga spitalet. Shpejtësia, parakalimet e rrezikshme, mungesa e kujdesit dhe siguria rrugore vijojnë të kthejnë asfaltin shqiptar në një nga vendet më të rrezikshme për drejtuesit dhe pasagjerët.
Bilanci i së hënës është ende paraprak, ndërsa dita nuk ka përfunduar ende.
