Transporti publik në Tiranë pritet t’i rikthehet kapacitetit të plotë, pas marrëveshjes së arritur mes qeverisë dhe shoqatave të Transportit Urban dhe Interurban. Palët kanë rënë dakord për kushtet e propozuara nga qeveria për përballimin e kostove të rritura të operimit pas shtrenjtimit të naftës.
Sipas marrëveshjes, qeveria do të subvencionojë naftën për një periudhë tre mujore, me qëllim lehtësimin e kostove për operatorët e transportit publik. Masa pritet të mundësojë rikthimin e të gjithë flotës së autobusëve në qarkullim dhe normalizimin e shërbimit për qytetarët.
Problematikat nisën më 1 shtator, pas rritjes së çmimit të naftës, duke detyruar shoqatat e transportit të paralajmëronin reduktimin me 20 deri në 30% të autobusëve në qarkullim. Me subvencionimin e dakordësuar, ky reduktim pritet të shmanget dhe transporti publik në kryeqytet të vijojë me kapacitet të plotë.
