Ministrja e Shëndetësisë, Evis Sala, raportohet se ka dhënë dorëheqjen nga detyra. Sipas mediave pranë pushtetit, gjatë mbledhjes së qeverisë ajo ka deklaruar se do të vijojë projektet e saj akademike. Largimi i saj vjen pas një periudhe të shoqëruar me diskutime dhe kritika për situatën në sistemin shëndetësor.
Rastet më të fundit ku Ministria e Shëndetësisë është përgjegjëse janë vdekja e nënës shtatzënë nga Pogradeci si pasojë e mosdhënies në kohë të ndihmës së parë dhe shërbimit me helikopter në drejtim të Tiranës dhe humbja e dy djemve në Vaun e Dejës si pasojë e vonesës së ambulancës së dëmtuar.
Vetëm gjatë muajve të fundit, JOQ Albania ka publikuar disa denoncime që lidhen me problematika në spitale. Në janar, JOQ raportoi për ndërprerjen e energjisë në Reanimacionin e QSUT-së, ndërsa në dhjetor publikoi pamje nga Onkologjiku ku pacientë, mes tyre të moshuar, prisnin në kushte të vështira. Në një tjetër rast, u ngritën pikëpyetje mbi deklaratën e ministres se në QSUT nuk mungonte asnjë ilaç, duke sjellë në vëmendje raportime për pacientë që përballeshin me vështirësi në sigurimin e trajtimeve.
Një nga denoncimet më të fundit të JOQ lidhet me QSUT-në dhe listën e pajisjeve që, sipas publikimit, mungonin në spital, përfshirë respiratorë, defibrilatorë dhe monitorë pacientësh, me vlerë të raportuar rreth 3.4 milionë euro. Po ashtu, JOQ ka raportuar edhe për problematika të tjera në sistemin shëndetësor dhe ka ngritur shqetësime mbi mënyrën e menaxhimit të shërbimeve dhe investimeve.
JOQ ka ngritur edhe akuza dhe pikëpyetje për marrëdhëniet mes drejtuesve të shëndetësisë dhe biznesmenit Klodian Allajbeu i cili e përdorte herë pas here si kukull ministreshën e Shëndetësisë, si dhe për mundësinë e përfshirjes së sektorit privat, pra spitalit Amerikan në menaxhimin e shërbimeve publike shëndetësore, veprime që arrinin deri në pushimin e mjekëve nga spitalet publike për t'i zëvëndësuar me ata të privatit.
Denoncimet kanë vënë në fokus edhe raste të mungesës, vonesave apo defekteve të ambulancave, si dhe problematika të shërbimeve spitalore në zona të ndryshme të vendit. Nëse dorëheqja e Salës zyrtarizohet, pritet që të bëhet e ditur edhe se kush do ta pasojë atë në drejtimin e Ministrisë së Shëndetësisë. Ministrja Sala e mori detyrën më 11 shtator të vitit të kaluar, në vend të Albana Koçiut.
