Një aksident i rëndë automobilistik është regjistruar mbrëmjen e sotme në bypass-in Mbrostar–Levan, pranë Spitalit Memorial të Fierit.
Një automjet tip “Volkswagen” ka humbur kontrollin dhe ka dalë nga rruga. Për pasojë, janë plagosur drejtuesi i mjetit, Indrit Shyti, dhe dy pasagjerët që udhëtonin me të.
Të tre të plagosurit janë transportuar me ambulancë drejt Urgjencës së Spitalit Rajonal të Fierit për të marrë ndihmën mjekësore. Drejtuesi i automjetit raportohet në gjendje më të rëndë dhe ndodhet në sallën e operacionit.
Aksidenti ka shkaktuar edhe krijimin e një kolone të gjatë automjetesh në këtë aks rrugor, ndërsa forcat e Qarkullimit Rrugor kanë mbërritur në vendngjarje për menaxhimin e trafikut.
Ndërkohë, ekspertët e kriminalistikës kanë nisur hetimet për të përcaktuar rrethanat e aksidentit dhe shkakun që çoi në humbjen e kontrollit të automjetit.
