Lëvizja Vetëvendosje dhe Lidhja Demokratike e Kosovës kanë arritur marrëveshje për një emër të përbashkët për president të vendit. Albin Kurti dhe Lumir Abdixhiku janë pajtuar që kandidati të jetë Bekim Sejdiu, jurist, profesor universitar, ish-diplomat dhe ish-gjyqtar i Gjykatës Kushtetuese.
Sejdiu, i lindur në vitin 1974, ka një karrierë të gjatë në institucionet e Kosovës. Ai ka shërbyer si ambasador i Kosovës në Turqi nga viti 2008 deri më 2012, ndërsa më pas ka qenë Konsull i Përgjithshëm në New York.
Në vitin 2015 u emërua gjyqtar i Gjykatës Kushtetuese, pozitë të cilën e ushtroi deri në vitin 2021. Krahas angazhimeve institucionale, prej vitesh është i përfshirë edhe në mësimdhënie universitare dhe në fushën e së drejtës ndërkombëtare.
Pas marrëveshjes mes VV-së dhe LDK-së, Sejdiu ka pranuar kandidaturën, duke deklaruar se është vënë “në shërbim të Republikës dhe qytetarëve tanë”.
Tashmë mbetet në dorën e Kuvendit nëse Bekim Sejdiu do të sigurojë votat e nevojshme për t'u bërë presidenti i ri i Kosovës.
