Çmimet e ushqimeve po vazhdojnë të rëndojnë xhepat e qytetarëve në Ballkanin Perëndimor, ndërsa Kosova renditet në vendin e dytë për rritjen më të lartë vjetore pas Shqipërisë.
Sipas të dhënave të Eurostat-it për korrikun e vitit 2026, çmimet e ushqimeve dhe pijeve joalkoolike në Kosovë janë rritur me 2.7% krahasuar me të njëjtin muaj të vitit të kaluar.
Në krye të rajonit qëndron Shqipëria, ku rritja ka arritur në 3.2%, ndërsa pas Kosovës renditet Mali i Zi me 2.3%.
Ndryshe është situata në Serbi dhe Maqedoninë e Veriut. Në Serbi, çmimet e ushqimeve rezultojnë 5.6% më të ulëta se në korrikun e vitit 2025, ndërsa në Maqedoninë e Veriut kanë shënuar rënie prej 0.3%.
Të dhënat tregojnë se rritja e çmimeve të produkteve bazë vazhdon të jetë një nga problemet kryesore për familjet në rajon, sidomos në vendet ku një pjesë e konsiderueshme e buxhetit mujor shkon për ushqime.
Në Shqipëri, rritja e çmimeve të ushqimeve është dukshëm më e lartë se mesatarja e Bashkimit Europian, ku në korrik shtrenjtimi ishte vetëm 0.6%.
Kosova, edhe pse nën nivelin e Shqipërisë, mbetet ndër vendet e rajonit ku qytetarët po përballen me presion të lartë nga shtrenjtimi i produkteve ushqimore.
