Një pamje e pazakontë nga qielli mbi Florida Keys po rikthehet sërish virale në rrjetet sociale, duke bërë që shumë përdorues të pyesin veten se çfarë është formacioni i çuditshëm që shfaqet mes reve.
Videoja është filmuar pranë Key West, Florida, në janar të vitit 2024, dhe tregon një formacion rrethor në re që në pamje të parë ngjan me një objekt gjigant të varur në qiell. Pamjet u shpërndanë gjerësisht në rrjet dhe ndezën edhe diskutime për një “UFO” të mundshëm.
Por ajo që duket si diçka e dalë nga një film fantastiko-shkencor ka një shpjegim krejtësisht tokësor.
Fenomeni njihet si “cavum”, ose “fallstreak hole” dhe “hole-punch cloud”. Bëhet fjalë për një boshllëk të madh, zakonisht rrethor ose eliptik, që krijohet brenda një shtrese resh.
Madje, fenomeni nuk kaloi pa u vënë re as nga NASA. Më 30 janar 2024, sateliti Terra fotografoi nga hapësira një grup formacionesh të tilla mbi Gjirin e Meksikës, pranë brigjeve të Floridës. NASA publikoi imazhin më 26 shkurt, duke shpjeguar se bëhej fjalë për të njëjtin fenomen atmosferik.
Sipas NASA-s, këto re formohen në shtresa resh të nivelit të mesëm, ku ndodhen pika uji që mbeten në gjendje të lëngshme edhe në temperatura nën zero. Kur një avion kalon nëpër këtë shtresë, ndryshimet e temperaturës dhe presionit mund të shkaktojnë ngrirjen e pikave të ujit. Kristalet e akullit më pas bien nga reja, duke lënë pas boshllëkun karakteristik që shihet në video.
Kjo është edhe arsyeja pse formacioni duket kaq i pazakontë nga toka: një pjesë e resë duket sikur është “shpuar” në mënyrë perfekte, ndërsa në qendër mund të shihen gjurmë të holla akulli dhe reshjesh.
Pra, edhe pse pamja ngjan me një skenë të pushtimit alien, NASA e ka një shpjegim shkencor për këtë “UFO” të çuditshëm mbi Florida.
Dhe ndoshta pikërisht kjo e bën fenomenin edhe më interesant: diçka që nga toka duket si një mister i madh, nga hapësira mund të shpjegohet me një kombinim avionësh, temperaturash dhe fizikës së reve.
