Mijëra njerëz u zhytën në një det me tul domatesh gjatë festivalit të famshëm La Tomatina, në qytetin spanjoll të Buñol, pranë Valencias.
Për rreth një orë, rrugët e ngushta të qytetit u kthyen në një arenë gjigante, ku pjesëmarrësit hidhnin domate të pjekura mbi njëri-tjetrin, ndërsa muzika shoqëronte festën. Këtë vit, për betejën u përdorën rreth 165 tonë domate.
Më shumë se 20 mijë persona pritej të merrnin pjesë në festival, me rreth 40 për qind të pjesëmarrësve që vijnë nga jashtë Spanjës. Shumë prej tyre mbërrijnë nga vende të ndryshme të botës vetëm për të përjetuar këtë spektakël të pazakontë.
Festivali është bërë veçanërisht i njohur në Indi pas filmit të Bollywood-it të vitit 2011, “Zindagi Na Milegi Dobara”, i cili përfshiu skena të frymëzuara nga La Tomatina.
Tradita daton në vitin 1945, kur një përleshje spontane mes të rinjve gjatë një parade përfundoi në një betejë me domate. Festivali u ndalua në vitet 1950, gjatë diktaturës së Francisco Francos, por banorët protestuan duke organizuar një “funeral” simbolik me një domate gjigante në arkivol.
La Tomatina u rikthye zyrtarisht në vitin 1959, me rregulla të qarta, përfshirë një kufizim të rreptë kohor dhe detyrimin për pastrimin e rrugëve pas përfundimit të betejës.
Sot, La Tomatina zhvillohet çdo vit të mërkurën e fundit të gushtit dhe është kthyer në një nga festivalet më të njohura dhe më të veçanta të Spanjës, duke tërhequr mijëra turistë nga e gjithë bota.
