Një ngjarje tragjike ka ndodhur të mërkurën, më 26 gusht, në liqenin e Komanit, ku një 20-vjeçar nga Kosova dyshohet se është mbytur teksa po lahej.
Ngjarja ka ndodhur rreth orës 17:30, në vendin e quajtur “Breg Lumi”, në Fierzë.
Sipas Policisë, i riu me inicialet L. D., rreth 20 vjeç, kishte hyrë në liqen së bashku me disa shokë. Pak më vonë, ai dyshohet se është mbytur në ujë.
“Rreth orës 17:30, në liqenin e Komanit, në vendin e quajtur ‘Breg Lumi’, Fierzë, shtetasi kosovar L. D., rreth 20 vjeç, i cili ka qenë së bashku me disa shokë, dyshohet se është mbytur teksa lahej në liqen”, thuhet në njoftimin e Policisë.
Pas ngjarjes, në vendin e ngjarjes ka mbërritur grupi hetimor, i cili po punon për dokumentimin e plotë të rrethanave dhe zbardhjen e dinamikës së ngjarjes.
I riu është identifikuar si Ledri Duraku. Për ndarjen e tij tragjike nga jeta ka njoftuar edhe shkolla ku ai ishte nxënës, SHMLT “Nexhmedin Nixha”.
Në një njoftim prekës, shkolla ka shprehur ngushëllimet për familjen Duraku, duke e kujtuar Ledrin si pjesë të komunitetit të saj.
“Humbja e një të riu është një dhimbje e madhe dhe e vështirë për t’u përshkruar me fjalë. Ledri do të mbetet në kujtesën tonë si pjesë e shkollës dhe e brezave që kaluan nëpër bankat e saj”, thuhet ndër të tjera në njoftimin e shkollës.
SHMLT “Nexhmedin Nixha” u ka shprehur ngushëllime familjarëve, të afërmve dhe miqve të 20-vjeçarit.
“U prehtë në paqe Ledri! Kujtimi për të qoftë i përjetshëm”, përfundon njoftimi.
Ngjarja ka tronditur familjarët, miqtë dhe komunitetin ku i riu ishte pjesë.
