Shërbimet inspektuese të Agjencisë së Ushqimit dhe Veterinarisë së Maqedonisë së Veriut kanë ndaluar importin e dy dërgesave me qumësht UHT nga Kosova, me peshë totale prej 27 mijë e 520 kilogramësh.
Sipas autoriteteve maqedonase, analizat laboratorike kanë zbuluar prani të aflatoksinës mbi kufijtë e lejuar. Për këtë arsye, qumështi nuk është lejuar të hyjë në treg dhe është asgjësuar nën mbikëqyrjen e veterinerit zyrtar në deponinë “Drisla”.
Qumështi ishte destinuar për shitje në një zinxhir marketesh në Maqedoninë e Veriut. Mostrat janë marrë në kuadër të Programit të Monitorimit, përmes të cilit kontrollohen produktet ushqimore me origjinë shtazore gjatë importit.
Agjencia e Ushqimit dhe Veterinarisë ka njoftuar se më 17 korrik ka vendosur masa të veçanta sigurie për importin e qumështit, produkteve të qumështit dhe produkteve që përmbajnë qumësht të kondensuar ose qumësht pluhur.
Me këto masa janë shtuar kontrollet zyrtare dhe analizat laboratorike, me qëllim që në tregun e Maqedonisë së Veriut të lejohen vetëm produkte që përmbushin standardet e sigurisë ushqimore.
