Një qytetar i është drejtuar redaksisë për të denoncuar një aksident të ndodhur gjatë natës në aksin Vlorë-Radhimë, pak pasi automjetet kishin kaluar tunelin.
Sipas denoncimit, qytetari po udhëtonte me një mik nga qendra e Vlorës në drejtim të Radhimës, kur një automjet dyshohet se ka dalë në krahun e kundërt të rrugës dhe është përplasur me makinën e tyre.
Denoncuesi pretendon se automjeti po lëvizte me drita të gjata dhe se drejtuesi kishte kryer disa shkelje të rregullave të qarkullimit. Përplasja ka qenë e fortë dhe, sipas tij, makina e goditur ka dalë nga rruga duke u përplasur me trotuarin.
Fatmirësisht, nga informacioni i dhënë nuk raportohet për persona të lënduar, por dëmet materiale në automjet janë të konsiderueshme.
Ngjarja dyshohet se ka ndodhur rreth orës 01:20 pas mesnate, ndërsa qytetari kërkon që pamjet e kamerave dhe materialet e videos të ndihmojnë autoritetet për të identifikuar drejtuesin e automjetit.
“Shpresoj ta lidhin këtë kamikaz që në orën 1:20 pas mesnate ecën në këtë mënyrë”, shprehet denoncuesi.
Megjithatë, pretendimet e qytetarit lidhur me shkeljet dhe rrethanat e sakta të përplasjes mbeten për t’u verifikuar nga autoritetet.
