Një rast kanosjeje është raportuar në Mitrovicën e Veriut, ku një grua ka pranuar në telefonin e saj një mesazh me përmbajtje kërcënuese dhe nacionaliste.
Sipas raportimeve, mesazhi i dërguar nga një person ende i paidentifikuar përmbante pretendime se “Kosova është Serbi”, si dhe thirrje që shqiptarët e Kosovës të largohen nga vendi.
Në vazhdim, përmbajtja e mesazhit është përshkallëzuar me kërcënime për luftë dhe deklarata për vrasjen e shqiptarëve të Kosovës.
Rasti është denoncuar në Policinë e Kosovës më 24 gusht, pasi mesazhi ishte pranuar një ditë më herët në telefonin e saj. Policia ka njoftuar Prokurorin kujdestar, i cili ka udhëzuar inicimin e procedurës për veprën penale “Kanosje”.
Hetimet po vazhdojnë për identifikimin e personit që ka dërguar mesazhin dhe zbardhjen e plotë të rrethanave të rastit.
