Arrestohet në Fier 45-vjeçari i dyshuar për krimin e rëndë në familje të ndodhur mbrëmjen e sotme në fshatin Zhymë të Lushnjës, ku nëna e tij 80-vjeçare humbi jetën dhe babai 77-vjeçar mbeti i plagosur rëndë.
Sipas informacioneve paraprake, gjithçka dyshohet se ka nisur pas një konflikti të 45-vjeçarit me vëllain e tij. Pas sherrit, situata është përshkallëzuar dhe ai dyshohet se ka sulmuar prindërit brenda banesës.
Rreth orës 21:20, 45-vjeçari Florion Dalladaku dyshohet se ka goditur me sqepar nënën e tij, Fanije Dalladaku, 80 vjeçe. E moshuara ka humbur jetën si pasojë e plagëve të marra.
Gjatë ngjarjes është plagosur rëndë edhe babai i tij, Hasan Dalladaku, 77 vjeç, i cili është transportuar në spital dhe ndodhet nën kujdesin e mjekëve.
Pas sulmit, 45-vjeçari është larguar nga banesa, duke vënë në lëvizje shërbimet e Policisë. Pas kontrolleve dhe kërkimeve, ai është lokalizuar në Fier dhe është arrestuar.
Sipas Policisë, Florion Dalladaku dyshohet se vuan nga probleme të shëndetit mendor. Ndërkohë, grupi hetimor, nën drejtimin e Prokurorisë, po vijon punën për dokumentimin e plotë të ngjarjes dhe zbardhjen e rrethanave dhe motivit të krimit.
