Prishtina ka nisur të marrë pamje festive në kuadër të aktiviteteve të organizuara me moton “Kosova po pret”, ku në kryeqytet ka filluar vendosja e flamujve të Ushtrisë Çlirimtare të Kosovës (UÇK).
Nënkryetarja e Prishtinës, Besianë Musmurati, ka bërë të ditur se flamujt janë vendosur në sheshe të ndryshme të qytetit, duke i cilësuar si simbol të historisë, sakrificës dhe krenarisë.
“Prishtina sot vishet me flamujt e lirisë sepse Kosova po pret kthimin e çlirimtarëve. Në çdo shesh, një simbol i historisë, sakrificës dhe krenarisë sonë”, ka shkruar Musmurati.
Vendosja e flamujve vjen nj6ë ditë pas aktivizimit të “Orës së Pritjes” në Bulevardin “Nëna Terezë”, e cila po numëron mbrapsht ditët, orët, minutat dhe sekondat deri më 16 shtator.
Aktivitetet janë pjesë e mesazhit “Kosova po pret” dhe zhvillohen në mbështetje të “Marshit për Liri”, i cili është paralajmëruar të mbahet më 12 shtator në Prishtinë.
