Detaje të reja mbi vrasjen e 20-vjeçarit portugez Luis Miguel Varela Mendes në Ksamil janë bërë publike përmes dosjes së Prokurorisë së Sarandës, të publikuar në media.
Dokumenti përshkruan me detaje dinamikën e konfliktit që ndodhi në orët e para të mëngjesit të 18 gushtit, në ambientet pranë kompleksit “Principotes”, dhe momentet që i paraprinë vrasjes së turistit.
Sipas dosjes, ngjarja ka nisur rreth orës 05:15, kur disa prej turistëve që kishin qenë në ambientet e “Principotes” kanë dalë në zonën e plazhit. Pak çaste më vonë, aty janë afruar Sokrat Lipan alias Sokrat Vata dhe David Heurtevent.
Nga pamjet e kamerave të sigurisë, të administruara në kuadër të hetimit, përshkruhen disa momente përleshjeje dhe ndjekjeje mes personave të përfshirë në konflikt.
Në orën 05:14:24, nga ambientet e “Principotes” dalin disa persona dhe qëndrojnë në zonën e rërës pranë subjektit “Paradise”. Mes tyre, sipas dosjes, identifikohen Ibrahim Lemoie, Sudae Akhmat, Florian Cetina dhe Luis Mendes.
Rreth një minutë më vonë, në orën 05:15:22, nga ana jugore e parkimit të “Principotes” shihen duke u afruar David Heurtevent dhe Sokrat Lipan alias Sokrat Vata.
Në orën 05:16:39, pamjet tregojnë një përplasje fizike mes Sokrat Vatës dhe një personi të veshur me të bardha. Vata largohet drejt zonës së shezlloneve, por pak sekonda më vonë, sipas dosjes, rikthehet duke ndjekur një prej personave në drejtim të parkimit.
Në orën 05:16:54, Vata shfaqet duke vrapuar në drejtim të Ibrahim Lemoie, i cili përplaset me shezllonet dhe bie në tokë. Sipas përshkrimit të pamjeve, Vata e godet.
Pak sekonda më pas, në orën 05:17:14, në konflikt ndërhyn Luis Mendes. Ai shtyn me trup Sokrat Vatën, duke e rrëzuar në tokë. Pas ngritjes, Vata i afrohet 20-vjeçarit dhe nis ta godasë.
Në orën 05:17:20, sipas dosjes së publikuar në media, David Heurtevent dhe Sokrat Vata godasin Luis Mendes. Në këtë moment ndërhyn edhe Sudae Akhmat, i cili shkon në ndihmë të shokut të tij dhe godet Vatën.
Përleshja vijon edhe në zonën e plazhit. Në intervalin 05:17:35-05:17:46, sipas pamjeve të përshkruara në dosje, Serxhi Selimi godet me grushte Ibrahim Lemoie.
Në të njëjtën kohë, Luis Mendes largohet me nxitim nga vendi i përleshjes, duke u futur në det, ndërsa sipas dosjes ai po përpiqej t’u largohej goditjeve që po merrte nga Sokrat Vata dhe David Heurtevent.
Në orën 05:17:53, 20-vjeçari del nga ana jugore e plazhit dhe afrohet pranë zonës ku ndodhen kamarierët. Aty, sipas dosjes, goditet me grushte nga Serxhi Ademi dhe shtyhet sërish drejt detit.
Vetëm pak sekonda më vonë, në orën 05:18:04, Mendes del nga uji dhe ecën drejt shezlloneve të plazhit “Paradise”. Në pamje, sipas përshkrimit të hetuesve, bluza e bardhë e të riut duket e gjakosur.
Në orën 05:18:24, David Heurtevent largohet në drejtim të ambienteve të brendshme të “Principotes”. Në pamje ai dallohet me njolla gjaku në pjesën e përparme të veshjeve.
Rreth dy minuta më vonë, në orën 05:20:28, largohet edhe Sokrat Lipan alias Sokrat Vata. Sipas dosjes, edhe bluza e tij e bardhë rezulton e gjakosur. Pas tij shihet kamarieri Ildi Cekani, i cili e shoqëron në drejtim të ambienteve të “Principotes”.
Dosja e publikuar në media sjell kështu një kronologji të detajuar të minutave të konfliktit, bazuar në pamjet e kamerave të sigurisë të administruara nga hetuesit.
Në qendër të hetimit mbetet përcaktimi i plotë i rolit të secilit prej personave të përfshirë në përleshje dhe momenti konkret kur 20-vjeçari Luis Miguel Varela Mendes u godit me thikë, plagë që i shkaktoi vdekjen.
Të dhënat e mësipërme i referohen përmbajtjes së dosjes së publikuar në media dhe pretendimeve të pasqyruara në dokumentet hetimore, ndërsa përgjegjësia penale e personave të dyshuar do të përcaktohet nga gjykata.
