Rreth 700 fluturime janë anuluar në aeroportin e Katanias, në Siçili, pasi shpërthimi i vazhdueshëm i vullkanit Etna ka dërguar hi vullkanik në atmosferë, duke detyruar autoritetet të pezullojnë operacionet ajrore në kulmin e sezonit turistik veror.
Kompania SAC, e cila menaxhon aeroportin e Katanias, njoftoi se të gjitha fluturimet në mbërritje dhe në nisje do të mbeten të pezulluara deri në orën 16:00 me kohën lokale të enjten, për shkak të pranisë së hirit vullkanik. Ndërkohë, janë zgjatur edhe kufizimet në disa pjesë të hapësirës ajrore të prekura nga reja e hirit.
Sipas agjencisë italiane të lajmeve ANSA, nga data 8 deri më 11 gusht janë anuluar rreth 400 fluturime në nisje, ndërsa dhjetëra anulime të tjera ishin planifikuar edhe për të mërkurën.
Qindra fluturime devijohen në aeroporte të tjera Problemet e shkaktuara nga shpërthimi kanë detyruar kompanitë ajrore të devijojnë më shumë se 250 fluturime drejt aeroporteve të tjera në Siçili, përfshirë ato të Comisos, Palermos dhe Trapanit.
Aeroporti i Comisos, në provincën e Raguzës, ka rikthyer tashmë operacionet e plota, pasi përkohësisht pezulloi fluturimet për shkak të ndotjes nga hiri vullkanik.
Me mijëra banorë dhe turistë që udhëtojnë në Siçili gjatë sezonit të ngarkuar veror, pasagjerëve u është bërë thirrje që të kontrollojnë drejtpërdrejt me kompanitë ajrore statusin e fluturimit përpara se të nisen drejt aeroportit të Katanias.
Ministri italian për Mbrojtjen Civile, Nello Musumeci, deklaroi se mbyllja e fundit e aeroportit ka rikthyer në vëmendje shqetësimet e kahershme për cenueshmërinë e aeroportit të Katanias, për shkak të afërsisë së tij me malin Etna.
I ndodhur në bregun lindor të Siçilisë, Etna është një nga vullkanet më aktivë në botë. Shpërthimi i fundit ka shkaktuar sërish ndërprerje të transportit ajror në të gjithë ishullin.
