Banorët e Krujës kanë përjetuar një natë të vështirë dhe të mbushur me panik, pasi flakët e zjarrit iu afruan rrezikshëm banesave, duke kërcënuar jetën e njerëzve dhe pronat e tyre.
Një prej banorëve ka rrëfyer momentet e tensionuara gjatë përballjes me flakët. Sipas tij, banorët u detyruan të ndërhynin vetë për të frenuar përhapjen e zjarrit, ndërsa situata u rëndua ndjeshëm teksa flakët iu afruan banesave.
Banori tregon se gjatë orëve të mbrëmjes situata u bë kaotike. Frika për përhapjen e zjarrit bëri që banorë të shumtë të nisnin evakuimin, ndërsa rruga u bllokua, duke vështirësuar edhe lëvizjen dhe ndërhyrjen e mjeteve zjarrfikëse.
Për banorët, nata u shndërrua në një betejë të vështirë me flakët, në përpjekje për të mbrojtur familjet dhe banesat e tyre.
“Kanë ardhur vetëm sa për të fikur vatrat e vogla, se zjarrin e kemi mbajtur vetë komplet. Kemi qenë tepër të rrezikuar, plaka thoshte nuk dal nga shtëpia le të digjem brenda. Ka qenë një tmerr i paparë. Dolëm nga banesa, nxorëm fëmijët e krejt, me siklet të madh. Erdhi u mbush oborri me çuna që e mbajtëm zjarrin. Zjarrfikësit dhe helikopterët e mbajtën njëherë në kontroll deri nga ora 10:00. Pastaj iu afrua shtëpisë dhe mori komplet pjesa e ullishtes. Doli zjarri rreth e rrotull shtëpisë, mori zjarr magazina e ujësjellësit. Ka qenë kaos i paparë. Krejt lagjia po evakuohej, u bllokua rruga e zjarrfikësesh, ishin njerëzit kush të ikte më parë. Krejt lagjia u tmerrua. Kishin frikë se do shpërthenin kabinat elektrike”, rrëfen ai për mediat.
