Një qytetar nga zona e 3-shit në Tiranë, pranë shkollës private Sarina, ka denoncuar mungesën e ujit prej më shumë se dy javësh. Sipas tij, banorët kanë kontaktuar disa herë me UKT-në, por përgjigjja ka qenë se problemi është raportuar, pa pasur ndërhyrje konkrete për rikthimin e furnizimit me ujë.
Krahas mungesës së ujit, qytetari denoncon edhe bllokimin e pusetave të një pallati, nga ku rrjedhin ujëra të zeza. Sipas tij, punonjësit kanë shkuar në vendngjarje, por nuk kanë mundur të hapin pusetën pasi nuk kishin mjetet e nevojshme. “Thanë që do vijnë përsëri, por ky muhabet ka që në maj dhe nuk kanë ardhur akoma”, shkruan ai.
Qytetari shprehet i shqetësuar për kushtet në të cilat po jetojnë banorët, veçanërisht për shkak të temperaturave të larta dhe pranisë së fëmijëve të vegjël. Ai kërkon ndërhyrjen e institucioneve për zgjidhjen e problemit, duke theksuar se mungesa e ujit dhe aromat e rënda të ujërave të zeza e kanë bërë situatën të vështirë për banorët e zonës.
