Një shpërthim i fuqishëm ka alarmuar mbrëmjen e sotme banorët e zonës së Laprakës në Tiranë, pranë Universitetit Katolik "Zoja e Këshillit të Mirë", ku një automjet është përfshirë nga flakët.
Pamjet e siguruara nga redaksia e JOQ Albania tregojnë mjetin tërësisht të përfshirë nga zjarri, ndërsa në vendngjarje ka mbërritur edhe zjarrfikësja, e cila po punon për shuarjen e flakëve.
Shumë qytetarë raportuan se fillimisht dëgjuan një shpërthim jashtëzakonisht të fortë, aq sa, sipas tyre, u tundën dritaret e pallateve përreth dhe zhurma u dëgjua edhe në zona të tjera të kryeqytetit.
Sipas dëshmive paraprake, dyshohet se shpërthimi mund të jetë shkaktuar nga impianti i gazit i automjetit, megjithatë ky mbetet vetëm një dyshim fillestar dhe ende nuk ka një konfirmim zyrtar nga autoritetet.
Deri në këto momente nuk raportohen persona të lënduar, ndërsa rrethanat e plota të ngjarjes mbeten ende të paqarta.
Pritet që Policia dhe shërbimet zjarrfikëse të dalin me një njoftim zyrtar për të sqaruar shkakun e shpërthimit dhe dëmet e shkaktuara.
