Një notues polak ka hyrë në histori duke u bërë personi i parë që ka përshkuar me not Detin Baltik nga Suedia drejt Polonisë pa dalë nga uji gjatë gjithë udhëtimit.
Bartłomiej Kubkowski mbërriti të dielën në plazhin e Dziwnów, në veriperëndim të Polonisë, pas një sfide të jashtëzakonshme prej rreth 160 kilometrash.
Notuesi polak ishte i shoqëruar nga varka mbështetëse, të cilat i siguruan ushqim, monitorim mjekësor dhe ndihmë për orientimin në det. Ai ishte nisur nga qyteti suedez Kåseberga 55 orë më parë.
Sipas rregullave të sfidës, Kubkowski nuk lejohej të prekte varkat, të hipte në to apo të flinte. Për ta përfunduar zyrtarisht përpjekjen, ai duhej të dilte nga uji dhe të qëndronte vetë në plazh, pa ndihmë.
Pas arritjes në breg, kur u pyet se si ndihej pasi kishte mposhtur më në fund Detin Baltik, Kubkowski tha: “Jam aq i rraskapitur sa ende nuk e di.”
Kjo ishte përpjekja e pestë e Kubkowskit për të përfunduar kalimin e Baltikut. Në vitin 2025, ekipi i tij u detyrua ta nxirrte nga uji pasi ai humbi ndjenjat, vetëm 11 kilometra larg bregdetit polak.
