Qeveria italiane synon të shfrytëzojë krizën migratore në Ceuta për t'i kërkuar Bashkimit Europian përshpejtimin e ngritjes së qendrave të riatdhesimit në vende të treta, sipas modelit të marrëveshjes Itali–Shqipëri. Roma kërkon që këto struktura të financohen nga buxheti i BE-së dhe jo më nga taksapaguesit italianë.
Sipas La Repubblica, kjo do të jetë një nga kërkesat kryesore që Italia do të paraqesë të martën në mbledhjen e ministrave të Brendshëm të BE-së. Qeveria e Giorgia Melonit është e pakënaqur me ritmin e zbatimit të Paktit të ri për Migracionin dhe Azilin dhe synon që kriza në Ceuta të shërbejë si shtysë për përshpejtimin e procesit.
Komisioni Europian pritet të rifillojë bisedimet me 12 vende të treta, mes tyre Ruanda, Tunizia, Libia, Egjipti, Mauritania dhe Etiopia, për ngritjen e qendrave të riatdhesimit. Propozimi do të shqyrtohet fillimisht nga ambasadorët e vendeve anëtare dhe më pas nga ministrat e Brendshëm të BE-së.
Roma beson se ka tashmë mbështetje të mjaftueshme politike për këtë nismë, duke iu referuar letrës së nënshkruar nga 22 liderë europianë me iniciativën e Giorgia Melonit. Megjithatë, Franca nuk e ka mbështetur këtë dokument, ndërsa opozita italiane akuzon qeverinë se po e përdor krizën migratore për qëllime politike.
