Një vajzë është aksidentuar në Vlorë, teksa po kalonte në vijat e bardha, pasi u përplas nga një automjet që dyshohet se nuk respektoi semaforin e kuq. Ngjarja ka ndodhur pranë ish-Hipotekës dhe ka shkaktuar reagimin e menjëhershëm të shërbimeve të emergjencës.
Sipas raportimeve paraprake, automjeti i përfshirë në aksident ka qenë një "Porsche" me ngjyrë të bardhë. Pas përplasjes, drejtuesi i mjetit është larguar nga vendi i ngjarjes, ndërsa rrethanat e plota të aksidentit janë ende duke u hetuar.
E reja e lënduar është transportuar në spital, ku ndodhet nën kujdesin e mjekëve. Ndërkohë, policia ka nisur hetimet për të identifikuar automjetin dhe drejtuesin e tij, si dhe për të zbardhur plotësisht dinamikën e ngjarjes.
