Një video që po qarkullon gjerësisht në rrjetet sociale tregon momentin prekës kur një emigrant, sapo arrin në breg pas kalimit të rrezikshëm me not drejt enklavës spanjolle të Ceutës, bie në gjunjë dhe falet, duke falënderuar Zotin që arriti të shpëtojë i gjallë.
Pamjet janë bërë simbol i dramës njerëzore që po shoqëron krizën e fundit migratore në kufirin mes Afrikës dhe Evropës. Ndërsa mijëra persona sfiduan detin për të arritur në territorin spanjoll, shumë të tjerë nuk ia dolën.
Sipas autoriteteve spanjolle, rreth 60 mijë persona hynë në Ceuta brenda 24 orëve, duke shënuar një nga valët më të mëdha të migracionit të parregullt të regjistruara ndonjëherë në kufijtë e Bashkimit Evropian.
Kjo përpjekje masive pati edhe një bilanc tragjik. Deri tani autoritetet kanë konfirmuar të paktën 57 viktima, shumica të mbytur gjatë tentativës për të kaluar detin, ndërsa numri i të vdekurve mund të ndryshojë me vijimin e kërkimeve.
Pavarësisht se shumë arritën në Ceuta, autoritetet spanjolle dhe Bashkimi Evropian kanë bërë të qartë se hyrja në enklavë nuk u jep të drejtën për të kaluar drejt Evropës kontinentale. Brenda pak ditësh, dhjetëra mijëra persona janë kthyer në vendin nga u nisën, qoftë vullnetarisht ose nëpërmjet procedurave të autoriteteve.
Videoja e emigrantit që falet në breg është shpërndarë mijëra herë në rrjetet sociale, duke ngjallur reagime të shumta. Për disa ajo simbolizon shpresën e një njeriu që i mbijetoi një udhëtimi vdekjeprurës, ndërsa për të tjerë rikthen në vëmendje koston e rëndë njerëzore që vazhdon të shoqërojë rrugët e migracionit drejt Evropës.
