Një kontroll rutinë me ultratinguj u shndërrua në një kujtim të paharrueshëm për një çift në Kanada, pasi vajza e tyre e palindur u duk se buzëqeshi në çastin kur dëgjoi zërin e të atit.
Momenti emocionues u regjistrua gjatë ekzaminimit prenatal. Ndërsa mjekët po kryenin ekografinë, babai iu afrua barkut të partneres së tij, Lia Oliveira, e puthi me dashuri dhe i foli vogëlushes.
Pak sekonda më vonë, në ekranin e ekografisë, foshnja u duk sikur buzëqeshi si reagim ndaj zërit të babait. Pamja emocionoi të gjithë të pranishmit në dhomë, ndërsa familjarët dhe stafi mjekësor shpërthyen në brohoritje dhe e nxitën babanë të vazhdonte t’i fliste vajzës së tij.
Videon e këtij momenti të veçantë e regjistroi motra e Lia Oliveira, duke fiksuar në ekran atë që dukej si buzëqeshja e foshnjës.
Duke kujtuar përjetimin, Oliveira tha se u pushtua menjëherë nga emocionet.
“Isha plotësisht e mbingarkuar nga emocionet dhe menjëherë shpërtheva në lot gëzimi,” u shpreh ajo.
Ajo e përshkroi këtë çast si një “kujtim të rëndësishëm” për familjen e tyre, duke shtuar se reagimi i vajzës ndaj zërit të babait e bëri përvojën edhe më të veçantë.
Oliveira tha gjithashtu se ndihet mirënjohëse që ky moment ka prekur miliona njerëz në mbarë botën dhe shpreson se ka sjellë “pak rreze dielli” në jetën e atyre që e kanë parë videon.
