Kalimi i tregut celular shqiptar në një strukturë me dy operatorë kryesorë (Vodafone Albania dhe One Albania, pas thithjes së Albtelecom) ka sjellë pasoja të drejtpërdrejta në xhepat e qytetarëve, të shoqëruara me shtrenjtim të shërbimeve dhe ngushtim të alternativave.
Të dhënat nga Autoriteti i Komunikimeve Elektronike dhe Postare (AKEP) tregojnë se shpenzimi mesatar i qytetarëve për telefoninë u rrit me 42.1% brenda një harku kohor prej tre vitesh, duke shtuar rreth 30 euro në faturën vjetore të çdo përdoruesi.
Paketat me parapagesë të niveleve të ulëta (si ato prej 500–600 lekësh) janë hequr nga pikat fizike dhe janë orientuar vetëm drejt kanaleve digjitale. Ndërkohë, paketat standarde (1,000–1,100 lekë) ofrojnë më pak internet, duke detyruar konsumatorët të zgjedhin alternativa më të kushtueshme.
Një hetim i Autoritetit të Konkurrencës ka konstatuar se të dyja kompanitë kanë ndjekur sjellje të përafërta tregtare gjatë periudhës 2022–2025. Ndryshimet e çmimeve dhe të përmbajtjes së paketave kanë ndodhur në intervale të afërta kohore dhe me ngjashmëri të lartë strukturore.
Pavarësisht konstatimit të ngjashmërisë së lartë në sjelljen e tregut dhe rritjes progresive të çmimeve, Autoriteti i Konkurrencës bëri të ditur se nuk janë gjetur prova të drejtpërdrejta apo të tërthorta për shkëmbim informacioni sensitiv ose marrëveshje formale për fiksim çmimesh mes operatorëve.
Megjithatë, vetë rregullatorët pranojnë se reduktimi i konkurrencës nga tre në dy lojtarë kryesorë i ka dhënë fund diversitetit të dikurshëm të ofertave, duke e lënë tregun në një ekuilibër të kushtueshëm për konsumatorët shqiptarë.
