Një qytetar ka raportuar për një situatë shqetësuese në zonën e Porto Palermos, duke treguar ndotjen alarmante të ujit.
Sipas tij deti është kthyer në një llum dhe baltë, ndërsa pushuesit e kanë të pamundur të futen në ujë.
"Nuk e dimë çfarë po derdhet në det. Ka papastërti të madhe dhe situata është shumë shqetësuese", shprehet qytetari në denoncimin e tij.
Qytetari thotë se uji i kristaltë që ishte dikur në Porto Palermo s’ekziston më pasi bregu është mbushur me barishte e baltë.
Ndërsa sezoni turistik vijon të sjellë mijëra pushues në bregdetin shqiptar, ndotja mbetet një nga problemet më shqetësuese të kësaj vere. Mbetjet urbane, shkarkimet e pakontrolluara dhe mungesa e një menaxhimi efektiv të mbetjeve po dëmtojnë vijën bregdetare dhe po cenojnë imazhin e destinacioneve turistike.
Qytetarët dhe operatorët turistikë kërkojnë ndërhyrje më të shpejtë nga institucionet përgjegjëse, në mënyrë që mbrojtja e mjedisit të mos mbetet vetëm një premtim sezonal, por një angazhim i vazhdueshëm për ruajtjen e pasurisë natyrore të vendit.
