Lufta e përgjakshme në Ekuador dhe lidhjet e Kartelëve Latinë me mafian shqiptare

Një reportazh i BBC sjell nga afër realitetin e zymtë në qytetin ekuadorian të Duránit, një prej zonave më problematike të vendit, ku trafiku i drogës, luftërat mes bandave dhe korrupsioni në institucionet shtetërore kanë krijuar një klimë të vazhdueshme pasigurie.

Kapiteni i policisë, Jean Carlos Bustamante, i cili drejton operacionet kundër grupeve kriminale, thotë se sfida nuk vjen vetëm nga bandat e armatosura, por edhe nga zyrtarët e korruptuar që bashkëpunojnë me to.

Sipas tij, shumë efektivë policie, politikanë dhe punonjës të administratës janë të lidhur me grupet kriminale, ndaj ai u beson vetëm pjesëtarëve të ekipit të tij të përzgjedhur. Bustamante udhëheq pothuajse çdo natë kontrolle në lagjet e kontrolluara nga bandat, ku banorët shmangin çdo bashkëpunim me autoritetet nga frika e hakmarrjes.

Gjatë një prej operacioneve, policia bastisi një banesë të braktisur ku zbuloi dy armë zjarri dhe municion për armë automatike. Për kapitenin, ky ishte vetëm një sukses i vogël në një betejë shumë më të madhe.

"Bandat kanë më shumë armë dhe më shumë para se shteti," shprehet ai, duke shtuar se tre miq të tij kanë humbur jetën në përplasjet me grupet kriminale.

Porta kryesore e kokainës drejt Europës

Ekuadori është shndërruar në një nyje kyçe të trafikut ndërkombëtar të kokainës. Sipas presidentit Daniel Noboa, rreth 70% e kokainës që mbërrin në Europë dhe SHBA kalon përmes territorit ekuadorian.

Droga vjen kryesisht nga Kolumbia dhe Peruja, ndërsa bandat vendase, në bashkëpunim me kartelet meksikane dhe grupet e mafies shqiptare, organizojnë transportin drejt tregjeve ndërkombëtare, duke përfituar nga kufijtë e dobët dhe kontrolli i pamjaftueshëm shtetëror.

Vetëm gjatë vitit të kaluar, në Ekuador u regjistruan mbi 9.200 vrasje, duke e renditur vendin ndër më të dhunshmit në botë.

Arrestime që shpesh përfundojnë me lirime

Në një tjetër aksion, policia arrestoi tre persona të dyshuar për trafik droge, pasi gjatë kontrollit u gjetën doza të drogës sintetike "H", e cila shitet lirë në rrugë dhe shkakton varësi të fortë.

Megjithatë, vetëm njëri prej tyre u procedua penalisht, ndërsa dy të tjerët u liruan nga prokuroria.

Sipas nënkolonelit Santiago Gavilanes, kjo është një situatë që përsëritet vazhdimisht.

"Ne i arrestojmë, por më pas i shohim sërish në rrugë. Bandat kanë para të mjaftueshme për të korruptuar pjesë të sistemit të drejtësisë," deklaron ai.

Bandat pranojnë se paguajnë policë

Një tjetër oficer policie, identiteti i të cilit mbahet sekret, zbulon se ka refuzuar oferta të majme ryshfeti, ndërsa pranon se dikush brenda sistemit u kishte dhënë bandave informacion për lëvizjet e tij.

Ndërkohë, një drejtues bande, i identifikuar me emrin e ndryshuar Jonathan, pranon hapur se paguan çdo muaj mes 1.500 dhe 2.000 dollarë për katër policë që e njoftojnë për operacionet e ardhshme.

Sipas tij, sa herë planifikohet një aksion policor, ai paralajmërohet paraprakisht dhe arrin të fshehë armët ose të largohet para mbërritjes së forcave të rendit.

Jonathan tregon se iu bashkua një bande në moshën 18-vjeçare për shkak të varfërisë dhe pranon se ka marrë pjesë në disa vrasje, duke pretenduar se objektiv kanë qenë vetëm rivalët.

Organizatat për të drejtat e njeriut paralajmërojnë se në Ekuador fëmijët rekrutohen nga bandat që në moshën 12-vjeçare dhe pak vite më vonë përdoren si vrasës me pagesë.

Një qytet ku vrasjet janë bërë pjesë e përditshmërisë

Vetëm dy net pas operacioneve të policisë, në Durán regjistrohet një tjetër ekzekutim. Një burrë u vra pranë motoçikletës së tij, ndërsa dëshmitarët thanë se autorët e qëlluan disa herë, fillimisht në shpinë dhe më pas në kokë.

Banorët e zonës thonë se atentate të tilla ndodhin pothuajse çdo ditë dhe se frika është bërë pjesë e jetës së tyre.

"Del nga shtëpia dhe mund të të kapë një plumb qorr. Kriminelët janë kudo dhe askush nuk e di se kush po e vëzhgon," rrëfen një dëshmitar anonim.

Pavarësisht pretendimeve të autoriteteve se numri i vrasjeve në Durán është ulur gjatë muajve të fundit, shumë banorë mbeten skeptikë, duke besuar se cikli i dhunës dhe hakmarrjes mes bandave është ende larg fundit.