Në protestën e zhvilluar këtë të hënë pranë godinës së Kuvendit, Policia ka degeneruar në përplasje fizike me protestuesit. Gjatë ndërhyrjes së efektivëve për shpërndarjen e turmës, situata ka shënuar momente të tensionuara, ku disa qytetarë janë shoqëruar drejt komisariatit.
Në pamjet e siguruara nga vendngjarja shihen disa prej protestuesve të shtrirë në tokë gjatë ndërhyrjes së forcave të policisë, të cilat kanë krijuar një kordon sigurie për të rimarrë kontrollin e zonës. Përplasjet nisën teksa protestuesit tentuan të çajnë rrethimin e policisë, çka solli një reagim të menjëhershëm të efektivëve të fushës dhe forcave të ndërhyrjes së shpejtë.
Deri më tani, autoritetet nuk kanë dhënë një shifër zyrtare për numrin e saktë të personave të shoqëruar apo për shkaqet e sakta që sollën përshkallëzimin e situatës, ndërsa tensionet vijojnë të mbeten të larta në perimetrin përreth parlamentit.
