Një video e filmuar në qytetin bregdetar të Qingdaos, në Kinë, po bën xhiron e rrjeteve sociale dhe ka hapur diskutime mbi mënyrën se si teknologjia po përdoret gjithnjë e më shumë për të monitoruar hapësirat publike.
Në pamje shihet një dron që i afrohet një pushuesi i cili po tenton të futet në det pas perëndimit të diellit. Përmes një altoparlanti, droni i kërkon vazhdimisht të largohet menjëherë nga uji, duke i kujtuar se noti gjatë natës është i ndaluar.
Pamjet janë bërë virale jo vetëm për mënyrën e pazakontë të komunikimit, por edhe për faktin se "urdhri" nuk jepet nga një polic apo rojë plazhi, por nga një mjet fluturues pa pilot.
Sipas mediave lokale, autoritetet në Qingdao përdorin dronë të pajisur me kamera, drita dhe altoparlantë për patrullimin e vijës bregdetare, me qëllim parandalimin e aksidenteve dhe largimin e personave që futen në det jashtë orarit të lejuar. Kjo praktikë është pjesë e masave të sigurisë në një zonë që pret mijëra pushues çdo sezon veror.
Megjithatë, videoja ka ndezur një debat të gjerë në rrjetet sociale. Një pjesë e komentuesve e konsiderojnë këtë një shembull të zgjuar të përdorimit të teknologjisë për të shpëtuar jetë, sidomos në zonat ku noti gjatë natës mund të jetë i rrezikshëm.
Të tjerë, në anën tjetër, e kanë krahasuar skenën me një realitet të ngjashëm me romanin "1984" të George Orwell, duke argumentuar se mbikëqyrja po shtrihet në çdo hapësirë të jetës publike, deri edhe në plazh.
Po ju si mendoni? A është ky një përdorim i dobishëm i teknologjisë për të garantuar sigurinë e pushuesve, apo një formë e tepruar kontrolli mbi qytetarët?
