Protesta qytetare kundër klasës politike vijon edhe këtë mbrëmje, duke hyrë në ditën e saj të 52-të radhazi. Pas fjalimeve të mbajtura para godinës së Kryeministrisë, qindra qytetarë kanë nisur marshimin e përnatshëm në rrugët kryesore të Tiranës.
Me pankarta dhe flamuj kuqezi në duar, protestuesit po përsërisin thirrjet "Shqipëria kërkon revolucion", duke kërkuar ndryshim dhe fundin e modelit politik që, sipas tyre, ka qeverisur vendin për 36 vitet e fundit.
Ajo që e bën këtë lëvizje të veçantë është vazhdimësia e saj. Për 52 ditë me radhë, qytetarët janë rikthyer çdo mbrëmje në shesh dhe në rrugët e kryeqytetit, duke e mbajtur të pandërprerë protestën. Organizatorët e konsiderojnë këtë një dëshmi të këmbënguljes, konsistencës dhe vendosmërisë së qytetarëve për të mos u tërhequr deri në arritjen e kërkesave të tyre.
Edhe sonte, marshimi po zhvillohet në mënyrë paqësore, ndërsa protestuesit vijojnë të përcjellin mesazhin se revolta e tyre nuk është e përkohshme, por një angazhim i përditshëm që, sipas tyre, do të vazhdojë derisa të ketë ndryshime reale në drejtimin e vendit.
