Falsifikoi martesën për t’u pajisur me dokumente në Britani, e pëson shqiptari

Sipas prokurorisë, në maj të vitit 2022 Hani kishte paraqitur një certifikatë martese të rreme, duke pretenduar se ishte martuar me një shtetase rumune në Qipro në vitin 2019, si pjesë e aplikimit për leje qëndrimi. Mashtrimi u zbulua pas verifikimeve me autoritetet qipriote, të cilat konfirmuan se numri i certifikatës nuk përputhej me asnjë regjistrim zyrtar.

Gjatë marrjes në pyetje, 30-vjeçari pranoi se nuk e kishte njohur kurrë gruan që figuronte në dokument dhe se e kishte blerë certifikatën për të qëndruar në Britani. Avokati i tij argumentoi se Hani ishte vetëm blerës i dokumentit dhe jo organizator i skemës, duke theksuar se ai kishte punuar, kishte paguar taksa dhe kishte siguruar të ardhura të rregullta në sektorin e dekorimit dhe menaxhimit të pronave. Megjithatë, gjykatësi e cilësoi veprimin e tij si një planifikim të rëndësishëm për të përfituar leje qëndrimi në mënyrë të padrejtë.