Policia e Shkodrës ka arrestuar 18-vjeçarin Arvin Fregjaj, i dyshuar si autori i plagosjes me thikë të 32-vjeçarit Vildan Kepëca, ngjarje e ndodhur paraditen e sotme brenda ambienteve të poliklinikës në lagjen “Vasil Shanto”.
I riu akuzohet për veprat penale “Vrasje e mbetur në tentativë” dhe “Mbajtja pa leje e armës së ftohtë”. Në pranga ka përfunduar edhe babai i tij, i dyshuar se ka bashkëpunuar në ngjarje dhe ka mbështetur të birin pas konfliktit.
Sipas hetimeve paraprake, rreth orës 11:30, pas një konflikti për motive të dobëta, 18-vjeçari ka goditur me thikë 32-vjeçarin Kepëca, i cili është dërguar me urgjencë në spital dhe ndodhet nën kujdesin e mjekëve.
Pas marrjes së njoftimit, efektivët e Policisë kanë ndërhyrë menjëherë në vendngjarje. Gjatë veprimeve hetimore, policia ka marrë informacion se Arben Kepëca, 41 vjeç, vëllai i të plagosurit, kishte marrë një armë zjarri pistoletë me fishek në fole dhe ishte nisur në kërkim të autorit të dyshuar.
Ndërhyrja e policisë ka parandaluar një përshkallëzim të mëtejshëm të konfliktit. Sipas autoriteteve, 41-vjeçari ka tentuar të largohet dhe ka hedhur armën që mbante me vete, por është kapur dhe arrestuar në flagrancë.
Grupi hetimor, nën drejtimin e Prokurorisë, vijon punën për zbardhjen e plotë të dinamikës së ngjarjes dhe për përcaktimin e përgjegjësive të personave të përfshirë.
