Pasi Këshilli Kombëtar i Partisë Demokratike votoi drejtuesit e rinj, kryetari Sali Berisha e cilësoi ekipin që do ta shoqërojë në drejtimin e selisë blu si një dëshmi të “ripërtëritjes” së partisë. Megjithatë, rezultatet e votimit tregojnë se postet më të rëndësishme vijojnë të mbahen nga të njëjtat figura që prej vitesh dominojnë strukturat drejtuese të PD-së. Flamur Noka u rikonfirmua Sekretar i Përgjithshëm, Gazment Bardhi dhe Agron Gjekmarkaj mbetën nënkryetarë ex officio, ndërsa emra të njohur si Belind Këlliçi, Klevis Balliu dhe Marash Logu morën role kyçe në kupolën drejtuese.
Në fjalën e tij, Berisha falënderoi të gjithë kandidatët që morën pjesë në garë, pavarësisht rezultatit, duke i cilësuar ata “personalitete të shquara të Partisë Demokratike”. Ai vlerësoi procesin e votimit si një shembull të funksionimit të votës së lirë brenda partisë dhe falënderoi Gazment Bardhin dhe komisionin e votimit për organizimin e procesit. Po ashtu, kërkoi ndjesë publike ndaj Lorenc Lukës, duke sqaruar se ai kishte dërguar një mesazh për të mos kandiduar, por ky njoftim ishte lexuar me vonesë, çka bëri që emri i tij të mbetej në listën e kandidatëve.
Edhe pse Berisha këmbënguli se përbërja e re “dëshmon vendosmërinë e PD-së për ripërtëritje” dhe foli për “personalitete ndër më të shquarat të fushave të tyre”, zhvillimet në Këshillin Kombëtar u shoqëruan me kritika nga brenda partisë. Në fund, megjithatë, votimi prodhoi më shumë vazhdimësi sesa ndryshim, duke lënë të paprekur pjesën më të madhe të kupolës drejtuese të Partisë Demokratike.
